7 iyun 2023

Ózbekstan Respublikası Prezidentiniń 2022-jıl 30-apreldegi “Ishki turizm xızmetlerin diversifikaciyalawǵa baylanıslı qosımsha ilajlar haqqında”ǵı PQ-232-sanlı qararına muwapıq, respublikadaǵı hár bir aymaqtıń turistlik potencialın tolıq kórsetip beriwshi turistlik kartaların (Guidebook) islep shıǵıw, baspadan shıǵarıw hám biypul tarqatıw wazıypaları belgilengen.

Usı múnásibet penen, Qaraqalpaqstan Respublikası Joqarǵı Keńesiniń baslaması menen Turizm hám mádeniy miyras ministrligi menen birgelikte “Bradt Travel Guides” basılımında Qaraqalpaqstannıń turistlik potencialı haqqında katalog tayarlaw joybarı ámelge asırıldı. Joybar sheńberinde 2022-jıl Ózbekstannıń Ullı Britaniyadaǵı turizm elshisi Sofi Ibbotson hám ǴXQ wákili Stefani Adams ushın elimizdiń bir qatar turistlik obektleri boylap press-tur shólkemlestirilgen edi. Press-tur dawamında shet elli miyman I.V.Savickiy atındaǵı mámleketlik kórkem-óner muzeyi, Qaraqalpaqstan Respublikası tariyxı hám mádeniyatı mámleketlik muzeyi, jas xudojnik Baxtiyar Serekeev hám onıń ákesi, Qaraqalpaqstan xalıq xudojnigi Bazarbay Serekeevtiń úy-galereyası, sonıń menen birge, Shımbay rayonındaǵı milliy ónermentler hám basqa da dıqqatqa ılayıqlı orınları menen jaqınnan tanıstı. 

Ámelge asırılǵan bul joybarlar nátiyjesinde, Qaraqalpaqstannıń turistlik potencialı haqqında katalog baspadan shıǵarılıp usı jıldıń iyun ayınan baslap Londan qalasında satıwǵa shıǵarıldı. Al 1-avgusttan bolsa bul katalog AQSh qalalarında satıwǵa qoyıladı.