07 декабря 2022

2022-jıl 7-dekabr kúni Qaraqalpaqstan Respublikası I.V.Savickiy atındaǵı mámleketlik kórkem óner muzeyinde Qaraqalpaq qol óneri bólimi ilimiy xızmetkeri N.Dáwletbaevanıń shólkemlestiriwinde "Qaraqalpaq xalqınıń milliy gilemshiligi» atamasında "Sheberlik sabaǵı" bolıp ótti.

"Sheberlik sabaǵı"nda ónerment  birlespesiniń aǵzası, kóplegen  shákirtler tayarlaǵan ustaz Biybisara Qunnazarova hám Qaraqalpaqstan Respublikası qániygelestirilgen kórkem óner mektep internatınıń oqıtıwshısı Qanshayım Kemalova óz shákirtleri menen qatnastı. Ilaj dawamında  B.Qunnazarova hám Q.Kemalovalar qatnasıwshılarǵa qaraqalpaq milliy gilem toqıw óneri haqqında maǵlumatlar berdi hám sonıń menen birge gilem toqıwdı ámelde kórsetti.  

"Sheberlik sabaǵı"n ótkeriwdegi tiykarǵı maqset xalqımızdıń qol óneriniń túrleriniń biri bolǵan gilemshilikti bunnan bılay da rawajlandırıwdan ibarat bolıp esaplanadı. Ǵárezsizlik jıllarında ata-babalarımızdan miyras bolıp qalǵan ónerlerdi qayta tiklewge ayrıqsha itibar berilip atır.

“Sheberlik sabaǵı”n Biybasara Qunnazarova ótkeredi. Ol  1957 jılı  Qaraqalpaqstan Respublikası Moynaq  rayonınıń  Qazaqdárya   awılında áwladtan-áwladqa ótip kiyatırǵan ónermentler  shańaraǵında    dúnyaǵa  kelgen.  Qaraqalpaq xalqınıń óneri  júda bay bolıp, sol katarda gilemshilik  óneri de jaqsı rawajlanǵan.  Ásirese Qazaqdáryalı  qız-kelinshekler  oǵada sheber bolǵan,  bunıń ayqın mısalı retinde  búgingi qaharmanımız Biybisara apanı kórsetiw múmkin.  B.Qunnazarova   gilem toqıwǵa balalıǵınan qızıǵıp  óziniń kempir apasınan  kishkene qız waqtında úyrengen   hám eń birinshi  ızba, dizbelerin   qara úyine tayarlaǵan  bolsa,   keyin ala   basqada baw-shuwların  toqıwdı úyrengeni haqqında  óziniń  sheberlik  sabaqları dawamında bizlerge  aytıp ótti.

Búgingi kúnde B.Qunnazarova ónerment  birlespesiniń aǵzası, kóplegen  shákirtler tayarlaǵan ustaz apamızdıń   suvenir  ónimlerinen,  elimizge kelgen  kóplegen sayahatshılar  estelik  sıpatında  alǵan bolsa, jergilikli xalqımız  sheber apamızdın toqıǵan qurları hám  baw-shuwları menen zamanagóy  qaraúylerdi, miymanhanalardı, restoranlardı bezep qoyıptı. Solay etip kempir apasınan úyrengen   gilem toqıw ónerin   shákirtlerine úyretip  qaraqalpaq xalqınıń  ata-babalarınan qalǵan  hám búgingi kúnde umıt bolıp baratırǵan  gilemshilik  naǵıslarınıń ulgilerin qayta tiklewde   jigerlenip jumıs alıp barmaqta.  Házirgi  kúnde  B.Qunnazarova   Nókistiń turistlik marshrutına óziniń cexın   qosıp  qaraqalpaqqa kelgen   sayaxatshılardı óz óneri menen hayran qaldırmaqta. 

     Búgingi ótkerilip atırǵan sheberlik sabaǵınıń muzeyde ótkeriliwiniń baslı maqseti  muzeyimizdiń ózinde gilemshilik  cexı  jumıs alıp barıp atır. Usı jerde aytıw orınlı  bir neshe jıllar aldın  muzey kóplegen jas qız-kelinsheklerdi gilem toqıw  ónerine  úyretip  bir neshe ay dawamında oqıttı hám óz gezeginde olar sertifikatqa iye gilemshi  bolıp jetilisti, solardan házirgi kúnde muzey cexında  gilem toqıytuǵın qızlarımız jumıs alıp barmaqta.