09 декабря 2022

Ózbekstan Respublikası Prezidentiniń 2022-jıl 27-maydaǵı “Muzeylerde xızmet kórsetiw tarawın rawajlandırıw is-ilajları haqqında”ǵı PQ-261-sanlı qararına tiykarlanıp  Qaraqalpaqstan Respublikası I.V.Savickiy atındaǵı mámleketlik kórkem óner muzeyide  "OPEN AIR FEST" atamasında bir qatar kewil ashar dástúrler shólkemlestirildi.

Dástúr sheńberinde muzeyde miymanda bolǵan balalar ushın  "Kubizm", "Sırlı eksponat", "Pantomimika" sıyaqlı bir qansha interaktiv oyınlar shólkemlestirildi. Qızıqlı oyınlardan soń balalar ushın muzeyimizdiń súwretlew óneri bóliminiń ilimiy xızmetkeri, Zulfiya atındaǵı mámleketlik sıylıqtıń iyesi A. Sapekeeva Sheberlik sabaǵın ótekerdi. "Sheberlik sabaǵın"da balalar muzeyimizde saqlanıp atırǵan G.Jeglov tárepinen sızılǵan "Qawın menen ǵarrı” kartinasınıń súwretin sızdı.

Sonday-aq ilaj sheńberinde Ámet  Baqsı atındaǵı 12- sanlı balalar saz hám kórkem óner mektebi oqıwshıları tárepinen saxnalıq kórinisler hám estrada bólimi oqıwshılarınıń jeke atqarıwındaǵı qosıqlar, Nókis qalası 1-sanlı Esjan baqsı atındaǵı  balalar muzika hám kórkem óner mektebiniń baqsı qızları tárepinen qaraqalpaq milliy qosıqları hám No'kis ka'nshilik institutı “Ziywar” ayaq oyını ansambliniń jigit qızları tárepinen qaraqalpaq milliy oyınları atqarıldı. Qaraqalpaq milliy qosıqları hám ayaq oyınları muzeydi tamashalawǵa kelgen shet ellik miymanlar ushında júdá qızıqlı boldı.

Sonıń menen bir qatarda imkaniyatı sheklengen balalar hám úlken jastaǵılar ushında bir qansha ilajlar ótkerildi.

Ilaj sheńberinde kún dawamında muzeyimizde miymanda bolǵan balalar, studentler, Tashkent, Jizzaq, Samarqant, Surxandárya wálayatlarınan hám Respublikamızdıń barshe rayonlarınan kelgen miymanlar ushın arnawlı ekskursiyalar shólkemlestirildi.

Shólkemlestirilgen kewil ashar dástúrlerden soń búgingi ilajda belsene qatnasqan balalar, 12-sanlı Ámet  Baqsı atındaǵı hám 1-sanlı Esjan baqsı atındaǵı   mektep oqıwshıları Húrmet jarlıqları menen sıylıqlandı.