22 ноября 2022 года
2022-jıl 22-noyabr kùni Qaraqalpaqstan Respublikası I.V.Savickiy atındaǵı mámleketlik kórkem óner muzeyinde Bazarbay Serekeevtiń "Ilham bulaqları" atlı kórgizbesiniń ashılıw máresimi bolıp ótti. Kórgizbeni Turizm hám mádeniy miyras basqarması ministri Rasul Zarekeev ashıp berdi. Soń muzey direktorı T.K.Mkrtichev shıǵıp sóylep Bazarbay Serekeevtiń ómir jolı hám onıń dóretpeleri haqqında aytıp ótti.
Sonday-aq ilaj dawamında kórgizbege kelgen bir qatar miymanlar shıǵıp sóylep xudojnik haqqında kóplegen maǵlumatlar berip onıń miynetlerin jáne bir márte eske aldı. Kórgizbege Nókis qalası 1-sanlı Esjan baqsı atındaǵı balalar muzika hám kórkem óner mektebi oqıwshıları qatnasıp qaraqalpaq milliy saz asbaplarında milliy qosıqlar aytıldı.
Kórgizbede Turizm hám mádeniy miyras basqarması ministri Rasul Zarekeev, Qaraqalpaqstan Respublikası Joqarǵı Keńesi baslıǵınıń Mádeniyat isleri boyınsha másláhátshisi Gúlbahar Izentaeva, Ózbekstan kórkem óner akademyasınıń Qaraqalpaqstan bólimi baslıǵı Ulbosın Utegenova, Bazarbay Serekeevtiń ómirlik joldası, shańaraq aǵzaları hám xudojnikler qatnastı.
“Ilham bulaqları” kórgizbesi
“Ilham bulaqları” kórgizbesi Qaraqalpaqstan xalıq xudojnigi, Qaraqalpaqstanda xızmet kórsetken mádeniyat ǵayratkeri, Berdaq atındaǵı mámleketlik sıylıqtıń laureatı, Ózbekistan Respublikası Prezidentiniń “Doslıq” ordeni hám Ózbekistan kórkem óner akademiyasınıń altın hám gúmis medalları iyesi bolǵan xudojnik Bazarbay Serekeevtiń 80 jıllıq yubileyine baǵıshlanadı.
Ol 1942 jılda Kegeyli rayonında tuwılǵan. Kóplep peyzajlar hám natyurmortlar janrındaǵı shıǵarmalardıń avtorı.
B.Serekeevtiń muzeydegi kórgizbesi simvolikalıq mánige iye.
Haqıyqatında da, B. Serekeevtiń xudojnik sıpatında qáliplesiwinde Nókis kórkem óner muzeyi, anıǵıraǵı onıń tiykarın salıwshısı I.V. Savickiydiń xızmeti úlken boldı. Olardıń eń birinshi tanısıwı 1969 jılda, jas xudojnik P. Benkov atındaǵı Tashkent súwretshilik texnikumın tamamlaǵan waqıtqa tuwrı keldi. Savickiydiń ózi B. Serekeevten dóretpelerin muzeyge alıp keliwin usınıs etken. Bul jumıslar bir jıl aldın sızılǵan 4 portret edi.
Ol dóretpelerdin “ózine unaǵanın” aytıp, muzeyde qaldırıwın soraydı. Tez arada jas xudojniktıń kartinaları muzey ekspoziciyasınan orın aladı. Házir muzeyde xudojniktiń 88 kartinası saqlanıp atır.
1969 jılǵa kelip xudojnik kórkem óner ustaxanalarında isley baslaydı, bul dáwirde onıń kóplegen shıǵarmaları jaratılǵan.
Kórgizbede muzey kollekciyasındaǵı hám xudojniktiń shańaraǵında saqlanıp kelgen kartinalar orın alǵan. Onıń dóretpelerinde ózi tuwılıp ósken ana jurt tábiyatı, qaraqalpaq xalıq qol óneri kórinisleri súwretlengen.
Úsh kórgizbe zalında xudojnik dóretiwshiliginiń kelip shıǵıwı haqqında gúrriń etiwshi: shańaraq, úlkemiz tábiyatı hám xalqımız úrp-ádet dástúrleri súwretlengen kartinalar orın alǵan.
"Meniń shańaraǵım" bóliminde biz Serekeevler shańaraǵı aǵzaları menen janrli saxnalardı yaǵnıy jaqınlarınıń portretlerin kóremiz. Xudojnik kóplegen dóretpelerdi úlken shańaraqqa baǵıshlaǵan. Olardıń arasında ónermenttiń hayalı, perzentleri, jaqın tuwısqanları haqqındaǵı kartinalar da bar.
“Meniń úlkem” bóliminde xudojnik úlkeniń bay tábiyatınan ilhamlanbastan qalmadı. Onıń sheksiz shóli, kóplegen kólleri, ájayıp haywanlar jasaytuǵın keń Ústirt tegisligi onıń hámiyshe ilham deregi bolıp keldi.
“Biziń úrp-ádetlerimiz” bóliminde gilem toqıp, kiyiz basıp otırǵan ónermenttiń hayalı súwretlengen kartinalardı tamasha etip, xalıq dástúrleriniń bay álemin kóriwińiz múmkin. Ol óz kartinalarında xalıq qol óneri buyımlarınıń reńlerin dál kórsete alǵan.
Xudojnik ómiriniń túrli jıllarında jaratılǵan kartinalar dóretiwshilik evolyuciyasınan dárek beredi: dóretpelerdegi obrazlar reallıqtan baslanıp, keyin ala shártli belgiler menen ańlatılǵan, yaǵnıy adrastaǵı boyalgan ikatlar hám milliy kiyiz buyımlarındaǵı naǵıslardı yadqa saladı.
© 2014. Копирование и использование материалов возможно только с разрешения Администрации музея. Контактная информация.