22 декабря 2022

2022-jıl 22-dekabr kúni Qaraqalpaqstan Respublikası I.V.Savickiy atındaǵı mámleketlik kórkem óner muzeyinde Qaraqalpaqstan Respublikası qániygelestirilgen mektep internatında imkaniyatı sheklengen balalar arasında ótkerilgen “Men haqqımda sızǵan súwretlerim sóyleydi” atamasındaǵı tańlawda jeńimpaz bolǵan  súwret salıwǵa qızıǵıwshı talantlı balalardıń  kórgizbesi bolıp ótti. 

Kórgizbeni muzey kásiplik awqamı baslıǵı B.Yusupova ashıp berdi hám bunday tańlawlardı ótkeriwden maqset imkaniyatı sheklengen balalardıń ishki ruwxıy dúnyasın bayıtıw, mámleketimiz ǵamqorlıǵın sezindiriw hám bul balalar itibardan shette emes ekenligin aytıp ótti. Kórgizbede Qaraqalpaqstan Respublikası Bántlik hám miynet qatnasıqları ministrliginen B.Allambergenov, Jaslar isleri agentligi Qaraqalpaqstan basqarmasınan G.Rametullaeva, Qaraqalpaqstan Respublikası qániygelestirilgen kórkem óner mektep-internatı oqıwshıları, Nókis qalası Esjan baqsı atındaǵı muzika hám kórkem óner mektebi oqıwshıları, Qaraqalpaq mámleketlik universiteti kórkem óner fakulteti oqıtıwshısı J.Abatov, Qaraqalpaqstan Respublikası kózi ázziler jámiyeti bólimi baslıǵı Q.Sharapov, “Ózbekstan mayıplar Associaciyası” Qaraqalpaqstan Respublikası aymaqlıq bólimi baslıǵı J.Narbaev hám tańlaw jeńimpazları qatnastı. Ilaj dawamında tańlaw jeńimpazları qáwenderler tárepinen sıylıqlandı.
 Sonday-aq kórgizbe qatnasıwshılarına muzey eksponatları jaylasqan zalları boylap arnawlı ekskursiyalar shólkemlestirildi.