2 сентября 2022 года
2022-jıl 31-avgust kúni Qaraqalpaqstan Respublikası I.V. Savickiy atındaǵı mámleketlik kórkem óner muzeyinde Ózbekstan Respublikası Ǵárezsizliginiń 31 jıllıǵına baǵishlanǵan Robert Rafailovich hám onıń balası Valeriy Falklerdiń dóretpelerinen ibarat “Ata hám bala Falkler" kórgezbesiniń ashılıw máresimi bolıp ótti.
Robert Rafailovich Falk - XX ásir belgili rus xudojnikleriniń biri bolıp, ol rásmiy sovet kórkem ónerinen parıq etetuǵın ayriqsha kórkem usılın tapqan dóretiwshi. "Bubnoviy valet komandasınıń aǵzası", VXUTEMAS professorı, Parijde derlik on jıl jasaǵan dáwiri, onıń kórkem óneri kereksiz bolǵan waqıtta on jıllıq tınıshlıqtı basıp ótiwi, óliminen keyin bolsa sovet dáwirdiń erkin dóretiwshiliginiń tımsallarınan birine aylanıwı -Xudojniktiń dóretiwshilik evolyutsiyası onıń mashaqatlı turmıs jolin sáwlelendirgenin kóriwimiz múmkin.
Muzeyimiz tiykarın salıwshısı I. V. Savickiy Samarqandda evakuaciya waqtında Robert Rafailovich Falk penen jaqınnan qatnastı. 1943 jılı R. R. Falk hám I. V. Savickiy Samarqanddaǵı emlewxanada bir palatada jatqanlıǵı haqqında maǵlıwmatlar bar bolıp, áyne sol jerde I. V. Savickiy R. Falktiń zayıbı. A. V. Shchekin-Krotova menen tanısadı. Kóp jıllar ótkennen keyin, xudojnik qaytıs bolǵannan keyin, A. V. Shchekin-Krotova I. V. Savickiyge muzey ushın R. R Falk dóretiwshilik iskerliginiń tiykarǵı basqıshların ózinde sáwlelendiriwshi shıǵarmalarınıń kishi toplamın jaratıw ushın járdem berdi.
Valeriy Robertovich Falk (1915-1943) - R. R. Falktiń E. S. Potekhina menen birinshi turmısınan balası. Arxiv materiallarına qaraǵanda, onıń balası menen munasábetleri mudami xudojnik ómirinde ayrıqsha orın iyelegen. Biraq, ol Valeriy menen Parijde (1933-1937) birge jasaǵan waqtında ǵana jaqınlasıǵá eristi. Sol jılları áke balasınıń kórkem ónerge beyimligin bilip, onı suwretlew kórkem óner menen shuǵıllanıwǵa isentirdi.
Sonday etip, Valeriy kórkem óner mektebine oqıwǵa bardı, atasına kino menen baylanıslı buyırtpalar boyınsha járdem bere basladı hám hátte 1936 jılda Zak galereyasında ótkerilgen rus xudojnikleri kórgezbesinde óz dóretpelerin kórsetti. Olardıń dóretiwshilik munasábetleri Moskvaǵa qaytıp kelgeninen keyin de dawam etti. Olar birgelikte 1940 jılı Mámleketlik evrey teatrında M. Yu. Lermontovtıń "Ispanlar".pe'sası spektaklın bezewde birge qatnasqan. Biraq, Valeriy Falktıń ómiri “Ekinshi Jáhán urısı” jıllarında tamam boldı. Salamatlıǵı jaman bolıwına qaramastan, V. R. Falk áskeriy xızmetge shaqırılǵan, Stalingrad sawashında qatnasqan, jaralanǵan hám 1943 jıl mart ayında emlewxanada qaytıs bolǵan. Ákesi bul haqqında tek 1943 jıl aqırında, evakuaciyadan Moskvaǵa qaytıp kelgeninde bildi.
R. R Falk ushın balasınıń ólimi dawalanbaytuǵın ruwxiy jaraǵa aylandı. Ol Valeriydiń dóretiwshiligin joqarı bahaladı jáne onıń kórkem miyrasları múnásip orın iyelewi ushın hámme nárse islewge háreket etti. Valeriydiń dóretiwshiligine bunday bólek munásibet R. R. Falktiń átirapındaǵı insanlar da bıyparq qaramadi, sol qatarda A. V. Shchekin-Krotova da. Onıń óz kollekciyasınan V. R. Falktiń 10 dóretpesin Nókis muzeyine sawǵa etkeni biykarǵa emes.Sonday etip, muzeyimiz óz zallarında birinshi ret Ata hám Bala Falklardıń barlıq jivopis kollektsiyasın - R. R. Falktiń 13 hám V. R. Falktiń 10 dóretpesin kórsetip atır. Aytiwimız múmkin, 1936 -jıldan berli Parijdegi “Rossiya xudojnikleri” kórgizbesinen keyin Ata hám balanıń dóretpeleri birinshi ret birgelikte kórsetilinip atır. Kórgizbe E. Gromova tárepinen usınıs etilgen arxiv fotoları menen toltırılǵan.
© 2014. Копирование и использование материалов возможно только с разрешения Администрации музея. Контактная информация.